Tliet studenti jingħataw il-Premjijiet Pearson għall-ogħla riżultati fil-livell nazzjonali

Tliet studenti eċċezzjonali kisbu rikonoxximent nazzjonali wara li ngħataw il-Premjijiet Pearson għall-kisbiet akkademiċi eċċellenti tagħhom fis-sessjoni tal-eżamijiet prestiġjużi Edexcel International GCSE tas-Sajf 2025. Liam Ellul Hawes kiseb l-Ogħla Marka f’Malta fl-Ingliż, Ilenia Vella kisbet l-Ogħla Marka f’Malta fil-Kimika, u Jeanine Marie Gatt ingħatat l-Ogħla Marka f’Malta fil-Bijoloġija.

Dawn il-premjijiet jirriflettu d-dedikazzjoni, il-perseveranza u l-impenn kontinwu tal-istudenti matul il-vjaġġ edukattiv tagħhom, kif ukoll l-appoġġ essenzjali mogħti mill-edukaturi, l-iskejjel u l-familji tagħhom.

Iċ-ċerimonja tal-preżentazzjoni tal-Premjijiet u ċ-Ċertifikati Pearson saret bid-Direttur tad-Dipartiment tal-Eżamijiet, is-Sinjura Desiree Scicluna Bugeja, l-Assistent Direttur tad-Dipartiment tal-Eżamijiet, is-Sur Michael Deguara, u l-Uffiċjal tal-Edexcel, is-Sinjura Raiza Pisani.

Il-Premjijiet Pearson ikomplu jippromwovu u jagħtu ġieħ lill-eċċellenza akkademika f’firxa wiesgħa ta’ suġġetti, filwaqt li jħeġġu lill-istudenti biex ikomplu jistinkaw għall-ogħla livelli ta’ suċċess fl-istudji tagħhom.